Cincu branchi e lenta arranchi o rinculi:
pari fatta cû cumpassu.
Cu mìlia branchiceddhi
scialusi e sciambrusi arrappi,
ricogghi u ta manciari cotiddianu.
Si’ tagghienti comu cozzu di cuteddhu
pi ghiàpriri cutugneddhi,
marancìculi e carapìnuli.
U to culuri giallinusu, russu pattuallu,
viddulinu, trucchinu e ginzianeddha
pari n’accubalenu marzolu
c’assumma dopu a burrasca
supra munti Cìccia.
Ô fundali spittàculu non cci nn’è uguali:
ti stitterri, nesci a freu, ti straviddichìi
all’umbra dî scogghi e mazzacani.
A natura ti sappi pittari e strapittari
pi mbillìri u tappitu persianu chi è u funnali,
campiunàriu di billizzi cilistiali.
E fra gemmi, brannuni e cosi rari
tu mi tuzzulìi, stiddha i mari.
Mi ricoddi un cettu Papòcchiu menzu llàcchiu
chi ti mpizzava fora a potta,
nsemi a na rattalora
mi non cci poti u malòcchiu.
Una stella di mare
Cinque branche e lenta arranchi o rinculi: / sembri fatta col compasso. / Con migliaia di tentacoli / gioiosi e sventaglianti arranchi, / raccogli il tuo cibo quotidiano. / Sei tagliente come coltello affilato / per aprire mitili, ricci e penne nobili. / Il tuo colore giallognolo,
rosso arancia, / smeraldino, turchino e genzianella / sembra un arcobaleno marzolino / che emerge dopo la burrasca / sopra monte Ciccia. // Al fondale spettacolo non c’è uguale: / ti sotterri, riemergi, ti attorcigli
/ all’ombra degli scogli e pietrisco. / La natura ti seppe dipingere e affrescare / per abbellire il tappeto persiano che è il fondale, / campionario di bellezze celestiali. / E fra gemme, laminarie e cose rare / tu mi stuzzichi,
stella di mare. / Mi ricordi un certo “Papocchio” mezzo scemo / che ti appendeva sopra la porta / insieme con un grattugia / per stornare il malocchio.