Cosi cu micciù si sta priparannu
p'a festa 'i Mezzaustu e pi' la Fera;
li missinisi tutti restirannu
c'a bucca aperta di bona manera.
Lu cumitatu sedi in permanenza
p'a bona rinisciuta d'u fistinu;
e pari chi li pigghia cu la lenza
'ddi gran prugetti tutti d'oru finu.
Lu presidenti è chinu di spiranza
e 'i missinisi sannu 'u so valuri
chiàcchiri non 'nni fa, ma fa sustanza
'stomu mudestu e gran lavuraturi.
Lu cirividdu havi 'i Salamuni
la menti soi non si stanca mai
e pi daveru un veru masculuni
chi parra picca ma cunchiudi assai.
Viditi missinisi cosi 'ranni
mugghi di chiddi di l'annu passatu
p'un misi 'nni scurdamu i nostri affanni;
e binidittu sia lu cumitatu
Leopoldo Siricio
Questa poesia Siricio la dedica al Cav. Lucio Speranza, instancabile Presidente del Comitato dei festeggiamenti dell'Agosto Messinese.