DINO VADALA'
L’autore: Dino Vadalà, nato nella seconda metà del secolo scorso, Messinese d.o.c.g. – come gli piace dire – in quanto nipote di sopravvissuti al terremoto, è ingegnere per professione ma autore e sceneggiatore per hobby.
E’ iscritto alla S.I.A.E. dal 1995, e con “I dialughi di Mata e Grifuni” è al suo debutto editoriale.
La copertina
La copertina dei "dialughi di Mata e Grifuni" è un olio su tela di Pippo Crisafulli.
L’editore
Copyright 2008 by edizioni “IL GABBIANO” di Maria Froncillo Nicosia.
Si riporta a seguire il primo dei quattro dialughi del libro.
“Correva l’ultimo mese dell’ultimo anno del ventesimo secolo e Mata e Grifuni, condotti inusualmente a Piazza Cairoli, così cominciarono a dialogare…
- Dialugu di Mata e Grifuni a piazza Cairoli
- Mata Ma chi ti ‘nni pari?
- GRIFUNI Di chi?
- Mata Comu di chi? Di stu fattu chi ‘nni purtaru cca: ‘nta piazza nova.
- GRIFUNI E non si cuntenta?
- Mata Cuntenta? Vardati che lisinu! Secundu tia aviria a jessiri cuntenta?
- GRIFUNI Allura, saria megghiu che stariumu ddà:
- o scuru, facci mucciati e compretamenti abbandunati
- ‘ppi tuttu l’unnvernu, come ‘nni lassaru fino a ora.
- Mata Vardatilu che beddu! Ma chi ti vutaru i sintimenti puru a tia?
- GRIFUNI Ma pirchì dici a sta manera?
- Mata Senti, donninniri chi non si autru, u nostru postu,
- non è chistu: ‘nta sta piazza, e menzu a strada.
- Ma ti pari giustu, che nui, chi semu l’antichi fundaturi
- della cittadi,da cui tutti discinnunu, avemu a stari cca
- ccu stu malutempu che si può vutari ‘nton vidiri e svidiri?
- GRIFUNI Ma quali malutempu.
- Unni nui, non chiovi mai.
- E poi…chi voi diri? che purtannunni cca,
- i nostri discinnenti missinesi, non ‘nni vonnu beni
- e non ‘nni rispettunu comu meritamu?
- Mata Certamenti. Accussì pensu!
- GRIFUNI Parrau, a gigantissa.
- Mata Ma pirchì, nericatu chi non si autru,
- non ti fai capaci, chi sta pinsata
- cu sapi cu l’eppi, ne ghiabbi e ne meravigghia chi bella testa
- ddi mittirinni cca, ‘nta sta
- piazza - chi mi pari cchiù scunchiuduta di prima
- tempu di Natali, è compretamenti fora locu.
- Semu, comu u cavulu a merenda.
- GRIFUNI Chi dicisti?
- Mata Comu u furmaggiu ‘nto piscistoccu.
- Non c’intrasemu. T’ha fari pirsuasu.
- Vidennunni misi cca, finisci chi i missinisi
- ‘nni considiririunu comu si fussimu ddu statui:
- si pigghiriunu tantu di cufidenza, rascannunni tutti,
- chi ‘nni danneggiriunu di malu modu; e poi…lassati
- all’acqua e o ventu ‘ppi daveru finiriumu comu
- du cartuni rimuddati.
- GRIFUNI Io non sugnu d’accordu.
- E ti dicu a verità ‘nta ddu depositu,
- vicinu o camposantu tuttu l’annu non ma passava:
- mi sentia comu malincunitu. Cca inveci sentu la genti
- chi giria ‘ntorno e la jurnata mi scurri.
- Mata Ma don Peppi Nappa chi non si autru,
- tuttu stu fetu di gassi di machini e muturini,
- stu burdillinu c’avemu ‘ntorno, com’è che ti può piaciri?
- Non ti rendi cuntu che facemu la figura di du pupi!
- GRIFUNI Senti, a mugghieri, io t’aju rispettatu sempri,
- però al grande e firoci Grifuni saracinu, nuddu mai ci dissi pupu.
- Dunca non sbagghiari a parrari…annunca…
- Mata Annunca? Chi fai?
- Scinni du cavaddu e mi ‘mmischi?
- GRIFUNI Esigio rispetto. ‘Nni miseru cca,
- e cca avemu a stari. Zitta e musca!
- Mata Si putiria scinniri du cavaddu sai chi faria?
- GRIFUNI Chi farivi, sintemu?
- Mata Mi ‘nninchianiria ddà supra e Cammari
- e ti lassiria cca sulu: comu un pedi di cannella,
- menzu a stu populu che, scuta a mia,
- non lo riconoscio cchiù.
- GRIFUNI Si la solita tragica.
- Ma nun ti rendi cuntu.
- I nostri discinnenti stannu facennu
- cosi granni! Stannu canciannu tutta
- La cittàdi: cosi ccu micciu!
- Ma non vidi cca ‘ntornu chiddu
- chi già s’ intravidi?
- Mata E c’aviria a vidiri? Sta specie i bardacchinu di lamera,
- chi non sacciu a chi può giuvari, essennu chi mancu
- è cummigghiatu e lassa passari u stissu: suli, acqua e ventu;
- sta filarata d’immpinnati, chi su boni ‘ppi storu di pisci;
- e tutti sti tendi sutta all’albiri chi pari n’accampamentu
- di ddi to cumpari saracini.
- GRIFUNI Ma si ci misiru u lignu puri ‘nterra, come ‘nte salotti boni.
- Mata Intantu a genti sciddica e si rumpi u coddu; e poi…unn’è
- chi su scippunu e su portunu a casa.
- GRIFUNI Bella fiducia chi hai ‘nte nostri discinnenti.
- Non c’è nenti di fari, ristasti retrogrita; niscisti o naturali :
- a Cammarota chi si.
- Mata E sugnu fiera.
- GRIFUNI Sutta a stu bardacchinu, comu u chiami tu,
- avi a passari u tram…lo capisci? Il tram!
- Mata Prima c’era u tram, e poi u livaru.
- Non ci piaciu cchiù!
- Ora u vonnu n’autra vota!
- Non hannu abbentu.
- E poi…cu sapi quannu passa
- di dda sutta!
- GRIFUNI Orammai, picca ci voli.
- Mata Campa cavaddu
- GRIFUNI Missina, saravi comu li megghiu cittadi di l’Europa.
- ‘Nformati, leggi, iapriti, non jessiri disfattista.
- I binari… i misiru, i fila i stinneru, a pensilina a ficiru…
- Mata Ma ancora però non sannu di unni avi a passari
- stu malanova di tram.
- GRIFUNI U sannu, u sannu, di unni avi a passari.
- Mata E cu tu dissi, sintemu?
- GRIFUNI Me niputi.
- Mata To niputi?
- GRIFUNI Me niputi Turi: u figghiu di me soru.
- Mata U sinnucu?
- GRIFUNI Gnorsì. Propriu iddu.
- Mata Ah, to niputi è?
- GRIFUNI E non si vidi? Tali e quali lu ziu:
- a stissa facci.
- Metticci la barba, e dimmi tu
- si ccu dda ‘mpigna di saracinu, non è precisu a mia.
- Mata Chistu è veru. Ma turnamu a stu tram.
- Chi ti dissi allura to niputi?
- GRIFUNI Mi dissi chi non passa cchiù da via Garibaldi, e sai pirchì?
- Mata Sintemu, pirchì?
- GRIFUNI Chiddi chi a menzaustu carriunu,
- chi cordi longhi longhi, strada strada da piramidi,
- unni ci sunnu santi, santareddi, ianciuli, suli,
- luna chi firriunu tutti ‘nta ‘na vota…
- Mata E parra chiaru: a Vara.
- GRIFUNI Si accussì a chiamunu i nostri discinnenti,
- e sunnu divuti assai ‘ppi sta vara…
- Mata A mia mu dici.
- GRIFUNI Non vosiru assolutissimamenti
- ch’ u tram passava ‘nta stissa strada di unni passa sta Vara.
- Mata E chi ficiru?
- GRIFUNI Non ti dicu e non ti cuntu.
- Sintia diri chi ficiru manifestazioni, comitati…
- dici, chi si rivulgeru perfino al Papa,
- pirchì stabileru, che non avi a passari cchiù di ddà.
- Mata A Vara?
- GRIFUNI Ma quali? U tram.
- Mata ‘Na vera putenza sti cumitati.
- GRIFUNI Cunvinceru, me niputi e tutta la cumacca,
- di fari passari u tram da n’autra parti.
- Mata Menu mali accussì putemu passari puri nui
- ‘ppi dda strada.
- GRIFUNI U sai chi non ci avia pinsatu
- chi puri nui passamu di ddà!
- Mata Ma senti ‘na cosa… Nui non passamu
- puri di unni u viali San Martinu?…
- GRIFUNI Certamenti!
- Mata E ccu stu bardacchinu, sti binari, sti fila,
- e sta gran filarata di pammari chi misiru
- a manu ritta e a manu mancu, m’addiri tu:
- di unni passamu nui?
- GRIFUNI Ragiuni hai? E comu facemu?
- Mata U peggiu è caru maritu miu,
chi non ci pinsau, mancu to niputi. - GRIFUNI Ma a iddu ci u fazzu a vidiri io,
- se s’avi a scurdari di nui, chi semu i so nanni.
- Ci fazzu fari, a morti subitania, un comitatu,
- accussì putemu cuntinuari a passari ‘nto viali.
- S’avi a vidiri si i fundaturi dell’antica cittadi
- hannu a jessiri menu da Vara! (continua)