Mi sentu ‘n’acidduzzu senza l’ali;
la vita passu comu Diu voli,
li jorna pi mia sunnu, tutti eguali
e pi cunfortu mancu du’ paroli.
L’invernu strinci e accurzunu ‘i jurnati,
lu celu si fa niru comu ‘a pici,
li sentimenti me’ sunnu canciati
e ‘stu curuzzu si senti ‘nfilici.
E penzu li me’ tempi assai biati,
li sirinati cu li megghiu amici,
sutta li barcuneddi illuminati
d’a luna china, chi ridia filici.
E quantu voti iò vitti agghiurnari
Sutta ‘na finistredda china ‘i ciuri,
mentri ‘nto celu si vidia spuntari
lu gran prudiggiuu di lu Criaturi.
Ora cchiù non mi fidu di vulari,
mi mancunu li forzi e lu caluri;
mi fici vecchiu; e chi ci pozzu fari?...
finiu la giuvintù; finiu l’amuri.
Leopoldo Siricio