Oh terra di Cariddi, cara e duci,
a tia vaiu purtannu la me’ ‘bbuci
e mentri vaddu l’unni dù to’ mari,
d’a nostra lingua ti vegnu a parrari.
Oh lingua di li nostri antichi patri,
unni i palori, comu latti ‘i matri,
foru gileppu ‘i tantu ‘nsignamentu,
picchì ti ‘stai piddennu all’acqua e o’ ventu?
Tutti i to’ figghi sù pueti rari,
chi amuri dannu cù lu to’ parrari,
e tantu è lu caluri e ‘a simpatia,
chi ognunu dici: “Beddha, sì pì mia!”
Facemulu parrari ‘stu dialettu,
signu d’amuri e di tantu affettu,
pì ‘sta città chi non ha ‘cchiù valìa
e di chisti e di chiddhi è in balìa.
Tu sì terra ‘i pueti e cantarini,
unni la zagra di li mannarini,
unni li versi, assemi a li canzuni,
un paradisu fannu d’ogni ‘agnuni.
Parramu a’ missinisa, pì favuri!
‘A storia dù dialettu, ‘nni fa onuri!
Ci sù figghioli chi mancu lu sannu
e a picca, a picca, poi si va scuddannu!
Dialettu! Sì vampa chi ‘ddhuma li cori
e di pueti to’, mai nuddhu mori.
Tu ‘nni quaddii, ‘nte ‘bbrazza ‘nni pigghi,
comu ‘na matri chi ‘ddhatta i so’ figghi!
Filippo Panarello