Supra di ‘ll’unni di ‘stu beddhu mari,
chi ciarameddhi sentu iò sunari!
Nascìu ‘u Bamminu, semu già a Natali!
E cù ‘stu sonu di ‘sta pastorali
dù celu, curunatu da li stiddhi,
p’a gioia di ranni e di li picciriddhi,
l’Anciuli scinnunu a milli, a milli,
mentri la terra tutta fà favilli!
Spittaculu divinu! Chi purtentu!
‘Sta musica purtata da lu ventu,
‘nn’inchiana ritti, ritti ‘n Paradisu,
mentri lu cori s’apri a lu surrisu
e penza o nostru beddhu Redenturi
chi veni o’ munnu pì puttari amuri,
pì cancillari li duluri e i peni
e diri a tutti: “Vulitivi beni!”
Filippo Panarello