di Pasquale Salvatore
Cu’ carriò la petra e la quacina,
cu’ travagghiò pi gghisari sti mura,
facènnumi cchiù forti, d’ura in ura,
dormi, e non s’arrispigghia a la matina:
dormi, di trenta sèculi…
O Missina,
tu intantu addivintavi gran signura!
Ma poi ti vosi ‘nterra la svintura,
mentri, cu’ potti, ti mintiu ‘ncatina.
Lu foristeri ora cchiù non ti vanta;
l’aria libbera to’ cchiù non cci coli.
Ed oramai di tia nuddu si scanta…
Ma, addritta e fermu, supra sta muntagna,
iò cci cantu, a cu’ voli e a cu’ non voli:
Missina cc’era, e Roma era campagna.