A’ Biata Eustochia Calafato
chi oggi Santa divintau!
Chi festa ‘ranni oggi c’è a Missina,
all’umbra di la beddha Madunnina!
‘A gioia ‘nta città è propriu tanta,
picchì diventa terra di ‘na Santa:
Eustochia Calafatu, la “Biata”,
chi Santa veni oggi proclamata
da Giuvanni Paulu secunnu,
chi ‘ppi la prima vota, ‘ntra lu munnu,
lassa Roma, e ‘nta città dù Strittu,
ci offri ‘e missinisi lu dirittu
d’aviri ‘na gran Santa cittadina
chi dugna onuri a la so’ Missina.
Parrannu a ‘rribba di lu nostru azzurru mari,
‘u Papa, ‘a vosi ccà canonizzari,
unn’iddha tantu fu “disiddhirata”,
nascennu ‘ntra ‘na staddha, all’”Annunziata”.
Biddhizzi, ‘nni spannia all’acqua e ‘o ventu
ma ‘nto so’ cori, un sulu sentimentu:
amari assai l’Ostia consacrata
ed èssiri cù Diu,’a so’ sposa amata!
Ci desi ‘e povireddhi ‘a so’ ricchizza,
assemi a tantu amuri e tinirizza,
e lassannu ‘a famigghia, accussì cara,
monica divintau di Santa Chiara
e Vergini Clarissa missinisa,
ristau a San Franciscu, suttumisa,
costruennu, cù ‘nu zelu assai sinceru,
di clausura un beddhu Monasteru,
‘unni ‘a so’ vita desi cù sprinnuri,
sirvennu notti e ghiornu lu Signuri,
assemi a tanti autri consorelli,
prigannu, ognuna, ‘nte so’ propri celli.
Figghiola ancora, ‘a so’ lampada stutau
‘u Signuri, e ‘n celu l’addhumau,
‘unni oggi, di ‘ll’Anciuli attorniata,
assemi all’autri Santi è ‘ncurunata.
Oggi, ‘e to’ pedi, ognunu a Tia s’inchina
e ‘sta terra, ‘a beddha to’ Missina,
cù cori ‘i matri, ‘n lacrimi, filici,
T’invoca amabili, gran protettrici.
Filippo Panarello