Oh terra di pueti e cantarini,
‘unni la zagra di li mannarini,
‘unni li versi, assemi a li canzuni,
un paradisu fannu d’ogni agnuni.
Tu sì un giardinu chinu d’ogni ciuri,
‘unni ogni cori canta a lu so’ amuri.
Tu sì ‘a ‘cchiù beddha, fra tutti li beddhi,
chi dugna gioia puru e’ povireddhi.
Oggi, però, non sì chiddha ‘i ‘na vota!
‘Nni pari stanca e si girau ‘a to’ rota!
E li to’ figghi, ditti li “buddhaci”,
pari chi divintaru ‘cchiù ‘ncapaci!
E quannu ‘a terra si metti a trimari,
tuttu suppotti e non ti fai ‘strammari,
e di ‘sta terra, ditta “ballarina”,
sempri ‘cchiù nova nasci tu, o Missina!
Brinnisi fazzu a tia, Missina cara,
un tempu duci ed oggi accussì amara!
Nostra è ‘a to’ pena e puru li to’ affanni
e ‘u cori è chinu di duluri ranni.
Trova lu modu ‘i dariti da fari
e si oggi ‘gghiutti ‘sti buccuni amari,
fallu pì nui chi ti vulemu beni:
svigghiti e ‘gghetta a ‘mmari ‘sti to’ peni!
Filippo Panarello