Quannu ‘a Sicilia, Diu vosi criari ,
cù gioia ranni e tantu surrisu,
di festa Iddhu vistìu ‘u celu e ‘u mari
e ‘a fici beddha, comu un Paradisu!
Spanni lu suli tuttu ‘u so’ caluri
e li giardini tutti fà ciurìri.
E’ terra, chista, china ‘i tantu amuri,
chi fà scuddari i peni e lu suffrìri.
Speci di ‘stati, è china ‘ì tanta genti,
e i furisteri, puru i ‘cchiù luntani,
vinennu tutti a trosca, tempu nenti,
fannu amicizia e battunu li mani.
Missina, chi d’ist’isula ciuruta
è terra fatta apposta p’incantari,
di furisteri è puru canusciuta
pì quanti cosi beddhi c’è ‘i gustari.
Piatti fotti sunnu i beddhi pisci
chi ‘nto Strittu s’a fannu a tutti l’uri,
speci di notti, sinu a quannu ‘bbrisci,
bersagliu sunnu d’ogni piscaturi.
Ci sunnu i custaddeddhi currioli,
fritti cauddi cù cipuddhuzza nova.
Ognunu ‘mmucca, a comu Diu voli,
ed è ranni lu gustu chi ci prova.
‘U piscispatu, poi, avi dirittu
‘rrustutu, a ‘gghiotta, cù so’ sammurigghiu.
‘Llanzatu ‘nta ‘stu nostru Strittu,
è tra li pisci, ò gustu, lu ‘cchiù ‘mmegghiu.
Ci sunnu, poi, i beddhi stuppadeddhi,
chi fannu scialacori a lu manciari,
nisciuti da so’ scoccia, e salateddhi,
a unu, a unu tu li poi gustari.
E ‘u piscistoccu, a poi, ‘unni ‘u mittiti,
chi senza, non po’ stari ‘u missinisi,
e si vinu dù Faru vi biviti,
‘rristati a panza all’aria e a ‘gghiammi tisi.
Vi ricuddati, ò vennedì, briscennu?
Ogni putìa ‘i piscistuccari
s’annava a ‘mmanu, a ‘mmanu poi inchennu
di genti chi vinìa pì ‘ccattari\
i ventri e ‘u piscistoccu ‘a patti a cuda,
pì ’gghinchiri ‘i ‘stu modu la pignata.
Chista è ‘na terra china di sprinnuri,
‘unni i coddhi, ‘a custera e i sò du’ mari\
sunnu rigalu di nostru Signuri,
pì fari ‘u missinisi, ‘rricriari.